Eze 15 | MEU | STEP | Iehova ena hereva na egu ai e kau, eto,

Ezekiel 15

Ierusalem na vine auna dikana na heto

1 Iehova ena hereva na egu ai e kau, eto, 2 Taunimanima natuna e, vine auna ese au haida ede e hereadia tomamu; vine rigina ese uda audia rigidia ede e hereadia tomamu? 3 Ḡau ta ikaralaina auna na iena amo e abiamu a? Iena amo ikoko ta e karaiamu bena una ikoko ai ḡau ta e taua daemu a? 4 A itaia, lahi auna ai e halaoamu; bena lahi ese duduna duduna e aradia oremu bona bogaragina na gida ai e laomu murinai ia na mai ena ḡaukara a? 5 A itaia, au tutuana miana ai na asi ena ḡaukara; matona lahi ese vada e araia bona gida ai vada ela negana ai ena ḡaukara be dahaka?

6 Taunabunai, Ḡaubada Iehova na ini e gwau tomamu: Uda audia bogaragidiai vine auna na lahi auna ai vada e halaoa heḡereḡerena ai, Ierusalem inoholaina taudia na unu baina kara henidia toma. 7 Lau ese vairagu na ediai baina ha-aukaia; ena be lahi amo bae roho mauri, to lahi ese do baine aradia ore; bena lau ese vairagu na ediai baina ha-aukaia negana ai na ba diba lau na Iehova. 8 Tano danu baina havahua, badina be e kara hebeatai. Ḡaubada Iehova na e herevamu.